क्षितिज के पार: पद्मावती-नागमती-सती-खंड-पद्मावत

पदमावति पुनि पहिरि पटोरी । चली साथ पिउ के होइ जोरी ॥

सूरुज छपा, रैनि होइ गई । पूनो-ससि सो अमावस भई ॥

छोरे केस, मोति लर छूटीं । जानहुँ रैनि नखत सब टूटीं ॥

सेंदुर परा जो सीस अघारा । आगि लागि चह जग अँधियारा ॥

यही दिवस हौं चाहति, नाहा । चलौं साथ, पिउ ! देइ गलबाहाँ ॥

सारस पंखि न जियै निनारे । हौं तुम्ह बिनु का जिऔं, पियारे ॥

नेवछावरि कै तन छहरावौं । छार होउँ सँग, बहुरि न आवौं ॥

दीपक प्रीति पतँग जेउँ जनम निबाह करेउँ ।

नेवछावरि चहुँ पास होइ कंठ लागि जिउ देउँ ॥1॥

नागमती पदमावति रानी । दुवौ महा सत सती बखानी ॥

दुवौ सवति चढि खाट बईठीं । औ सिवलोक परा तिन्ह दीठी ॥

बैठौ कोइ राज औ पाटा । अंत सबै बैठे पुनि खाटा ॥

चंदन अगर काठ सर साजा । औ गति देइ चले लेइ राजा ॥

बाजन बाजहिं होइ अगूता । दुवौ कंत लेइ चाहहिं सूता ॥

एक जो बाजा भएउ बियाहू । अब दुसरे होइ ओर-निबाहू ॥

जियत जो जरै कंत के आसा । मुएँ रहसि बैठे एक पासा ॥

आजु सूर दिन अथवा, आजु रेनि ससि बूड ।

आजु नाचि जिउ दीजिय, आजु आगि हम्ह जूड ॥2॥

सर रचि दान पुन्नि बहु कीन्हा । सात बार फिरि भाँवरि लीन्हा ॥

एक जो भाँवरि भईं बियाही । अब दुसरे होइ गोहन जाहीं ॥

जियत, कंत ! तुम हम्ह गर लाई । मुए कंठ नहिं छोडँहिं,साईं !

औ जो गाँठि, कंत ! तुम्ह जोरी । आदि अंत लहि जाइ न छोरी ।

यह जग काह जो अछहि न आथी । हम तुम, नाह ! दुहुँ जग साथी ॥

लेइ सर ऊपर खाट बिछाई । पौंढी दुवौ कंत गर लाई ॥

लागीं कंठ आगि देइ होरी । छार भईं जरि, अंग न मोरी ॥

रातीं पिउ के नेह गइँ, सरग भएउ रतनार ।

जो रे उवा , सो अथवा; रहा न कोइ संसार ॥3॥

वै सहगवन भईं जब जाई । बादसाह गड छेंका आई ॥

तौ लगि सो अवसर होइ बीता । भए अलोप राम औ सीता ॥

आइ साह जो सुना अखारा । होइगा राति दिवस उजियारा ॥

छार उठाइ लीन्ह एक मूठी । दीन्ह उडाइ, पिरथिमी झूठी ॥

सगरिउ कटक उठाई माटी । पुल बाँधा जहँ जहँ गढ-घाटी ॥

जौ लहि ऊपर छार न परै । तौ लहि यह तिस्ना नहिं मरै ॥

भा धावा, भइ जूझ असूझा । बादल आइ पँवरि पर जूझा ॥

जौहर भइ सब इस्तरी, पुरुष भए संग्राम ।

बादसाह गढ चूरा, चितउर भा इसलाम ॥4॥

अगर आप भी अपनी रचनाओं को हम तक पहुँचाना चाहते है तो अपना नाम, संक्षिप्त स्व-जीवनी तथा अपनी कृतियाँ हमें नीचे दिए हुए संचार पते पर भेजे|

क्षितिज के पार